تمهيد ضروري:
لا تقدم هذه المادة اتهاماً جنائياً لأي طرف، لكنها تجمع معطيات منشورة وقرارات رسمية ومعلومات متداولة في السوق، وتطرح أسئلة مشروعة حول الشفافية وتضارب المصالح المحتمل في قطاع حساس يمس غذاء السوريين اليومي.

نشرت المادة في 18 شباط 2026

بعد مجموعة من التسجيلات الصوتية وشوية فيديوهات انتشرت من شمال سوريا، ظهرت فيها دواجن ودجاج ميتة، وأصوات مزارعين عم يقولوا إنو طاعون الدجاج انتشر بسوريا وعم يسبب أمراض للناس.

أطلقت وزارة الطوارئ والكوارث، مع وزارة الصحة، تحذيراً من انتشار مرض طاعون الدجاج بسوريا. التحذير ما عاش إلا ساعات قليلة يوم تسعة شباط 2026، لما تراجعت الوزارة عنو واعتبرتو لاغي، وقالت إنها تعرضت للبس بالمعلومات....

حتى إنو مدير المؤسسة العامة للدواجن فضل حاج هاشم طلع بلقاءين، وعتب على الوزارتين بسبب التحذير.

بعشرة شباط، معاون وزير الزراعة أيهم عبد القادر، على الإخبارية السورية، قال إنو كل الصوتيات لا تستند لأساس علمي وهي إشاعات.

بالعودة للتسجيلات الصوتية، اللي قدرت منصتنا تحصل عليها، لاحظنا إنو المتحدثين عم يركزوا على فكرة وحدة، وهي مقاطعة شراء وبيع الدجاج والبيض بعد ارتفاع سعرو، وعم يربطوا المقاطعة بانتشار الأمراض.

بعيداً عن انتشار المرض من عدمو، ومع تضارب البيانات الرسمية بين التحذير والتأكيد، بعدين النفي، وبين تسجيلات المربين الصوتية، في حقيقة ثابتة وحدة، وهي ارتفاع أسعار الفروج والبيض بالسوق السورية خلال الأسابيع الماضية.. وهو مربط خيلنا وموضوع نكشنا وبحثنا...

لحتى نفهم أكتر شو عم يصير تماماً...
منحب نعرفكم على معالي الوزير قتيبة بدوي، ...هو مسؤول من وين ما رنيتو برن.

هو:
رئيس الهيئة العامة للمنافذ البرية والبحرية بمرتبة وزير.
"رئيس اللجنة الوطنية للاستيراد والتصدير".
عضو المجلس الأعلى للتنمية الاقتصادية.
ممثل المجلس الأعلى للتنمية الاقتصادية في مجلس إدارة الشركة السورية للبترول.

هو سابقاً كان مدير معبر باب الهوى بين سوريا وتركيا إبان... قوية هي إبان، إبان سيطرة هيئة تحرير الشام على إدلب. يعني قبل التحرير.

شو علاقة البدوي بالدجاج؟

البدوي أطلق مجموعة كبيرة من القرارات خلال الفترة الماضية -بمختلف مناصبو- إلها علاقة بالاستيراد والتصدير، آخرها كان يوم 15 كانون الثاني 2026، واللي بيمنع استيراد الصوص وبيض الفقس دعماً للإنتاج الوطني، وهو القرار اللي فجر الإشاعات والتسجيلات الصوتية والفيديوهات.

الموضوع بصير أكثر غموضاً ومدعاة للبحث والسؤال وحشرية المواطن كتير الغلبة متلنا، لما بتوسع الدائرة أكتر، مو بس لمناصب قتيبة الكتيرة، إنما لمناصب ومصالح وعلاقات عائلة البدوي كلها.

ونحنا ما عم نتهم حدا، ولا عم نقول إنو في تضارب مصالح ولا محسوبيات. عم نفكر بس، حتى ما عم نصطاد بالمياه العكرة.

منرجع لورا بالزمن.

لأيلول 2025، سانا عم تحتفل بإطلاق الجمعية السورية للدواجن.
رئيس الجمعية هو...
معد بدوي.
أخو لقتيبة.

الجمعية قالت إنها انطلقت لتكون قناة أو جسر بين المربين والمؤسسات الحكومية، هي قلنا معد.

وهي الجمعية باختصار تمثل القطاع الخاص بصناعة الدواجن بسوريا.

بس معد كمان عندو منصب تاني مالو حكومي، معد هو مستشار شركة ريان فود الغذائية، وخلي اسم الشركة هي ببالك شوي.
وهو رئيس جمعية غراس الخيرية.

تسلسل الأحداث الملحمية

قبل بشهر من إطلاق الجمعية، بشهر آب 2025، كان وزير الاقتصاد نضال الشعار لسا قدران ياخد قرارات إلها علاقة بالاستيراد والتصدير، لأنو هو وزير الاقتصاد، وسفق وقتها قرار لمنع استيراد الفروج المجمد.

وقتها انبسطوا المربين وقالوا: يا هيك القرارات يا بلا.. وهاد هو دعم الاقتصاد الوطني.

تسرعوا المربين وقتها.

بعد بشهر من قرارها الأول، تراجع الشعار جزئياً عن القرار. أصدرت الوزارة استثناء خاصاً بمعامل اللحوم.. المرتديلا.

المزارعين ومربي الدواجن احتجوا على القرار، واعتبروا إنو أصحاب المعامل رح يرجعوا يبيعوا الفائض عندهم بالسوق بالتفاف على القرار.

بشهر 11، ألفين وخمسة وعشرين، تأسست اللجنة الوطنية للاستيراد والتصدير، وصار رئيسها..... قتيبة بدوي، وتحول وزير الاقتصاد نضال الشعار لمزهرية فيما يتعلق بالاستيراد والتصدير، وصارت اللجنة تقرر كل ما يتعلق بالاستيراد والتصدير، من البندورة والبيض وصولاً إلى الدراجات النارية.

والقرارات بيوقعها مرتين قتيبة، مرة باسم اللجنة الوطنية، ومرة باسم هيئة المعابر الحدودية.

لهون بينتهي مبدئياً دور قتيبة مع أخو معد، ليفسحوا المجال لفرد جديد من العائلة.

المرتديلا...

في معمل اليوم بسوريا اسمو ريان فود، عم ينتج مرتديلا اسمها ريان.

مرتديلا ريان.. أو شركة ريان فود.
اللي رئيس مجلس إدارتها مين؟ مين؟ من بيت مين؟

سعد بدوي أبو سلمو المدير التنفيذي في الشركة.
وهي شركة بتملكها عائلة البدوي.

تأسست سنة 1996.
وبدأت بإنتاج المرتديلا سنة 2023، تحديداً بشهر سبعة.

ريان مو بس بتنتج مرتديلا خاصة فيها، إنما شوي شوي رح تسيطر على كل إنتاج المرتديلا بالبلد...

المثير بقى إنو لقينا شركة اسمها ريان فود مسجلة في بريطانيا من سنة 2021.
بس هاد لا يثبت شي، وما عم يقول شي، وما إلو أي معنى....

بتكبر نظرية المؤامرة عند مجموعة من الاقتصاديين السوريين لما بيقولوا المعلومة التالية:

إذا متذكر كيف سمح الشعار باستيراد الدجاج المجمد لمعامل المرتديلا، استفادت شركة ريان فود من هاد الاستثناء، واستوردت 1700 طن من لحم شرحات الدجاج، اللي عادة لا تستخدم ضمن تصنيع المرتديلا، وحسب اللي قالتو جريدة الحرية، تم ضخ كميات كبيرة من هي الأطنان بالسوق، لبيعها بشكل مباشر قبل التصنيع.

المعلومة التانية اللي عم يحكي عنها اقتصاديين، وهي غير مثبتة:
بس الحكومة الرشيدة جسمها لبيس وإلها سوابق.

ريان فود وقعت عقد لتأمين المرتديلا للجيش السوري، يعني صفقة بملايين الدولارات... مرة تانية حكي مغرضين وبحاجة لشفافية من الدولة لتقول إذا صح لما لا.

هاد بيرجعك لصغار المربين، أو للتسجيلات الصوتية الغاضبة اللي كان واضح إنو من مصلحتها مقاطعة شراء لحوم الدجاج والبيض، مو بس لارتفاع أسعارها، لا، لعملية احتكار التصنيع والإنتاج بالسوق، اللي ممكن تعدلك من حيث لا تعلم شكل رجال أعمال نظام الأسد انت أكبر قدر.

المستهلك

بدك نرجع للطاعون؟ مرة تانية لا ننفي ولا نؤكد.. فنزلنا وسألنا الناس شو سمعوا وشو رأيهم وهل ارتفع السعر مؤخراً؟

foxpop

مافي قدامنا إلا إنو نسمع المصادر الرسمية شو عم تقول، بس بدك تنتبه إنها مو عطول بتقلك كل شي.. لأنو هاد ديدنها بكل مكان بالعالم، قوية هي ديدنها.

منعرف إنك ضعت شوي.
رح نرجع نرتبلك الأمور شوي..

منرجع لعائلة البدوي.

حسب الكاتب حسام جزماتي، عنا أربعة أخوة من عائلة البدوي:

قتيبة صاحب أربع مناصب.
معد صاحب الثلاث مناصب.
مصعب مدير دار نقش، هي الدار طبعت كتب السيد حسين الشرع بين سنوات 2020 و2023.
وهو مدير سابق لهيئة التخطيط والتعاون الدولي، قبل ما يتغير اسمها وتصير ضمن وزارة الخارجية عند سعلبنا.
وحذيفة اللي كان أمني سابقاً في تحرير الشام، ومافي أي معلومات عن منصب حالي إلو...
ومجموعة من أولاد العمومة اللي بيملكوا معامل ومصانع في البلاد.

هل إذا حاسس إنو في تضارب مصالح، أو محسوبيات، أو شامم ريحة فساد، هي مشكلتك، روح حلها مع نفسك.

فيك تشوف المادة من هون

الجزء الاول: https://www.instagram.com/p/DU58uHpFMXT/?hl=ar

الجزء الثاني: https://www.instagram.com/p/DU6RXulALth/?hl=ar

الجزء الثالث: https://www.instagram.com/p/DVEgHkGDPJX/?hl=ar

A Commander in Our Iron Army Gets a “Bogus” Certificate from a Turncoat in Love with Assad

Related Articles

The Al-Badawi Family... Positions and Gains in This Homeland